Home Habari Omog atamba kuendeleza ushindi Msimbazi

Omog atamba kuendeleza ushindi Msimbazi

569
0
SHARE

NA SAADA SALIM,

KAMA unadhani kocha mkuu wa Simba, Joseph Omog, amebweteka na pointi 35 walizonazo kileleni, unakosea kwani Mcameroon huyo anawaza kupata pointi nyingine leo dhidi ya African Lyon.

Wekundu hao wa Msimbazi watakuwa Uwanja wa Uhuru kucheza na African Lyon ambapo Omog ametamba kuwa kilichopo kichwani mwake ni kuhakikisha wanaondoka na pointi tatu muhimu.

“Kwetu kila mchezo ni fainali, tunataka kumaliza mzunguko wa kwanza bila kupoteza na hilo linaweza kutimia kutokana na maandalizi mazuri tuliyoyafanya,” alisema.

Simba itashuka dimbani ikiwa na matumaini makubwa ya kumtumia mshambuliaji wake, Fredrick Blagnon ambaye hakuwepo katika michezo miwili iliyopita kutokana na kuwa majeruhi baada ya kuumia katika mchezo dhidi ya Toto Africans.

Blagnon amerejea kikosini ambapo juzi na jana alijiunga na wenzake katika mazoezi yaliyofanyika Uwanja wa Boko Veterani na kuna asilimia kubwa ya kutumika katika mchezo wa leo.

Simba wapo kileleni wakiwa na pointi 35 wakiwa hawajapoteza mchezo wowote huku Yanga wakifuata katika nafasi ya pili wakiwa na pointi 27 na sasa Wekundu hao wa Msimbazi wanataka kuwaacha mbali wapinzani wao hao.

Katika mchezo huo Simba itaendelea kuwaamini washambuliaji wake wakiongozwa na Shiza Kichuya mwenye mabao tisa kileleni, Mohamed Ibrahim, Ibrahim Ajib pamoja na Laudit Mavugo.

Wakati Simba mambo yakiwa mazuri, kwa upande wao African Lyon huenda ikakosa baadhi ya wachezaji wao tegemeo akiwemo Hood Mayanja na Tito Okelo pamoja na William Otong’o.

Hata hivyo, kocha mkuu wa kikosi hicho, Fernando Jose Bernado, alisema kikosi chake kipo vizuri na atahakikisha wanaondoka na pointi zote tatu.

LEAVE A REPLY

Please enter your comment!
Please enter your name here